政壇：鍾國斌催生港版東大門
話說立法會紡織及製衣界議員Felix鍾國斌，喺舊年開始推動將長沙灣一帶成衣業界聚集起來，打造成港版南韓首爾東大門，變成流行服飾集散地。不過，所謂「三軍未動、糧草先行」，冇錢就乜都唔使講，所以佢打算揼政府各種基金心口，連賽馬會都係考慮之列，估計要百幾二百萬元。
鍾國斌想喺長沙灣搞港版「韓國東大門」，估計要百幾二百萬元資金。
Felix坦言，如果要貿易發展局或旅遊發展局幫手宣傳，「東大門」就要以非牟利團體形式運作，所以佢就以香港製衣同業協進會名義籌辦。睇番資料，佢係協進會永遠榮譽會長，要搞相信都唔係太難。至於資金方面，佢就話會考慮搵民政事務總署「伙伴倡自強」社區協作計劃、工業貿易署中小企業發展支援基金，以至馬會慈善信託基金，但寫計劃書等程序繁複，估計都要搞一年半載。
佢又話暫時已經搵到三幅地，面積合共有過萬呎，相信可以做到好似馬會都有贊助嘅中環元創方（PMQ）咁，租畀新進設計師開檔，租金就希望係PMQ嘅一半喎！
