政壇：「滴滴打車」停補貼 訂單急跌43%
內地打的軟件結束「燒錢戰」，無咗現兜兜嘅現金補貼，班乘客即時以行動表現不滿。騰訊投資嘅北京小桔科技話喺停咗補貼之後，公司旗下打的軟件「滴滴打車」嘅訂單量已由高峰期嘅日均五百三十萬單，跌咗去三百萬單左右，跌幅有四成三咁多。
雷軍（圖）話馬雲嘅創業史，對佢影響最大。（資料圖片）
「滴滴打車」？乜唔係「嘀嘀打車」咩？大家唔好以為係錯字呀，原來「嘀嘀打車」改咗名。事源杭州有間叫妙影嘅電子軟件公司，近排向法院起訴「嘀嘀」打車商標侵權，話「嘀嘀」個商標佢哋早已註冊咗喎，單案件已經被杭州市中級法院正式受理，小桔科技如果輸咗官司分分鐘要賠成八千萬人仔，公司為免麻煩，一於改名為「滴滴打車」。
至於阿里巴巴集團有份投資嘅「快的打車」就話，因為時間太短，未計到結束補貼嘅影響。不過，「快的打車」就會同小米合作，以後用戶只需要利用小米旗下智能按鍵「米鍵」，就可以使用「快的打車」。其實，小米董事長雷軍一向好敬佩馬雲，佢仲話研究過馬化騰、李彥宏等大佬們嘅創業史，當中對佢影響最大嘅就係馬雲。
