政壇：莫乃光同拉布搶時間
今屆政府早就想成立創新及科技局（創科局），但上屆立法會就政府架構重組「拉布」拉到冇咗，近日政府決定捲土重來，商務及經濟發展局尋日就向立法會提交文件，話會喺下月向立法會提出成立創新及科技局嘅決議。資訊科技界議員莫乃光就即日搶閘去信內務委員會主席梁君彥，要求喺明日討論為設立創科局成立小組委員會。佢話依家會議時間緊迫，加上預咗有議員會就成立創科局「拉布」，所以早啲提出成立小組，望賺多一星期時間，可望喺七月休會前通過。
設計圖片及對白
打算同拉布分子會面
立法會近年「拉布」成風，除咗大會連年就財政預算案「拉布」，就連財務委員會及工務小組都出現「拉布」。議員「大舊」陳偉業就一早揚言，政府若要成立創科局，佢就會「拉布」抗議。莫乃光就話依家大會積落唔少議員動議，就算預算案「拉布」完結，相信之後嘅周三至周五都要處理積落嘅議程，換言之其他委員會就只能選擇周一、二開會，所以及早提出成立小組委員會，望可以賺番啲時間。至於做唔做小組委員會主席，佢就話冇乜所謂喎！
不過，莫乃光就估計小組委員會只係處理技術上嘅問題，唔會係「拉布」嘅主場。政府要就成立創科局開設新職位，又要申請撥款，故預料議員會喺人事編制委員會及財委會「拉布」。為咗令創科局盡快成立，佢話已努力做游說工作，仲打算拉埋資訊科技界嘅泛民選委同大舊、社民連梁國雄等「拉布」分子會面添。
莫乃光苦口婆心話業界一直都好希望可以有創科局幫吓業界，又幫吓香港年輕人發展。香港競爭力排名係咁跌，新加坡追過香港已成事實，怕再唔做啲嘢，深圳都會超越香港咁話。
