不怕人力斷層 就怕官僚無能

政府最新人力資源推算結果顯示，到二○二二年本港將會欠缺近十二萬勞動力，比政府兩年前推算到二○一八年人力短缺大約一萬四千人，增加近十倍，即使延長退休年齡、鼓勵家庭主婦重投勞力市場，仍欠一大橛，情況非常嚴峻。

咁到底邊類勞動力最吃香呢？原來係高中及以下學歷人士最搶手，差不多欠成十五萬人，反而高學歷人士可能出現輕微過剩。咦，咁就奇嘞，乜唔係話香港人擁有大學或以上學歷嘅唔夠兩成，低過唔少第三世界地區嘅咩？仲點會嫌多呀。鬼咩，香港經濟結構單調，年輕人飽讀詩書又點吖，唔係做銷售就做經紀，根本無用武之地。唔好話本地大學生吖，外地人才都唔願意嚟香港大展拳腳，睇吓優才計劃，每年平均批得嗰四百人咁大把，連原定名額嘅一半都唔到，咁搞法，高學歷人才有咩辦法唔供過於求吖。

至於中低學歷勞動力短缺，原因不難理解。大型基建相繼上馬，政府又話要增建房屋，建造業為吸引人手，部分工種甚至一年加薪兩次添。又由於旅遊業旺盛，服務業人手一樣咁緊缺，之前試過有餐廳開價萬六蚊請洗碗工都冇人肯做，問你服未？

有工冇人做，你話點算好？身兼政府人口政策督導委員會委員嘅港大教授葉兆輝話喎，政府應該多管齊下，除咗提升婦女勞動力、培訓單程證人士做初中以下學歷工作等措施外，亦可以考慮輸入外勞。學者呢番建言，啱晒財政司司長曾俊華脾胃啦，事關佢早前話勞動力短缺係香港經濟發展嘅主要大障礙，而新加坡近年經濟得以蓬勃發展，好大程度歸因於大量輸入外勞同大量填海造地，羨慕之情溢於言表。

冇錯，新加坡過去十年輸入超過一百二十萬外勞，為經濟發展注入大批生力軍。之不過咁喎，人哋新加坡政府強政勵治，講得出也做得到；香港呢，乜嘢都拗一大餐，就講輸入外勞吖，前排勞顧會只是提出話題啫，社會上已經嘈到拆天，試問港產官僚，有乜把炮落實輸入外勞呀？

計太一叮話齋，當局與其向高難度挑戰，不如應付好燒到埋身嘅危機先啦。立法會拉布鬧劇沒完沒了，萬一香港真係跌落「財政懸崖」，經濟下行，失業率大升，咁就唔使為輸入外勞煩惱嘞，叮！