被香港審計署之報告揭發帳目混亂的「香港龍獅節」,於立法會帳委會聆訊中,竟是混帳加混帳;到「開庭」時,全體與會議員還未收到「龍獅節」的財務報告。沒有資料,叫人如何「聆訊」?此舉擺明「造數」之荒謬,簡直已去到「無法無天」地步!

關乎香港福祉命脈的政改諮詢,收取全民意見書三萬多份,不足兩星期,林鄭姊弟三人組已站出來「交功課」,話「主流意見」點點點啦!你一個小小「龍獅節」竟用五個幾月時間,延期又延期,都畀唔到一份敢見人的報告?

龍獅節的頭領,那民建聯的陳鑑林被議員質疑有「造數」之嫌時,囂張地否認,相信,佢忘記了喺四月十七日,接受電視訪問有關「創造三千個職位」的「受薪」問題時,記者問會否「做一條數畀佢哋(調查者)睇,符合佢哋要求?」陳鑑林答:「無錯!喺某程度上,我哋為符合佢哋要求,去畀一個數字佢。」嗱!有證據o架!仲唔係「造數」?

二○一○年,香港廉政公署防貪委員會曾建議將「盛事基金」摺埋,點知貪曾煲呔竟加碼灌水一億五千萬;而向立法會申請撥款續辦基金活動時,卻隻字不提廉署的「關注」。可恨的商經局(即蘇錦樑做局長那檔嘢)嘅芝麻官,常任秘書長黃灝玄話廉署的只是個建議,卻非一定要執行的措施,「最重要」仲係無法定寫低喺正式「防貪報告」度喎!呢啲奴才有幾禍港,一眼睇晒!

明眼人皆看到此「醜事基金」之醜惡時,江湖傳聞有人話掟二百個出嚟,一定可以擺平單嘢,咪所以講嘢咁老定囂爆囉!

陳鑑林交出的報告「受薪名單」,只是「一張紙」,仲話不可能寫晒全部人落去,喂!我哋點知你哋有無請黑工o架!你哋個底花晒o架!仲有,我要求當局追查埋以往上幾屆嘅「龍獅節」的數,因全部都係呢幫人做嘅,唔知仲有無不見得光嘅景轟!徹查呀!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps