中國人幾千年嚟都為咗王位打生打死，其實又唔止中國，只要有人嘅地方，就會出現爭做領袖嘅紛爭，例如好多國家選總統，唔同黨派內部都會率先狗咬狗骨，直至死剩一個先行出嚟爭奪大位，一個唔覺意天命所歸，昂首指點江山，你話幾神氣呢。

少膽虫我雖然唔係服侍朝廷，但喺一間小小嘅壹全霉，都可以嗅到爭權奪位嘅血腥。就搵啲編輯嚟講下，佢哋日日對住班垃圾記者寫嘅垃圾稿，然後用自己嗰支「算係見得人」嘅筆修修改改，咪就好似死人化妝師咁，等篇稿聽日出殯「算係見得人」囉。偏偏呢班食塞米就以為自己做緊乜嘢建國大業，為咗A1編輯個位互相算計抹黑，看在本腦腫眼內，就好似兩條鼻涕蟲打交咁無謂，何必呢？

其實只要睇吓港鐵，就知道做契弟最着數啦。唔係咩？港鐵有乜衫長褲短超支延誤，總有個大股東政府做契哥挺身而出，幫佢解畫、圓謊、硬食民憤，港鐵班契弟就印印腳出嚟just to say hi，何其梳乎。咁少膽虫我呢條契弟呢？咪就係有淫賤黎呢個契哥做冤大頭，幫我亂請人、亂揈錢埋單囉，仲養到我肥肥白白添……契哥，多謝晒！

第一手消息請下載on.cc東網iPhone/iPad/Android/Windows Phone Apps