城中鏡：新地辦暑期實習助新一代覓路向
好多年輕人都驚畢業變咗失業，前路茫茫都唔知點算好？若果有人幫你一把，從旁指點嘅話，可能機會就多咗啲嘞！由新地贊助，並同突破機構合辦嘅「師徒創路系列2013-14『見』造未來——生涯探索與領導計劃暑期全方位體驗」尋日舉行誓師禮，新地為參與今次計劃嘅年輕人，提供二十一個工作實習機會，仲會由新地嘅資深員工擔任師傅，為學員提供八個星期嘅職場指導。有師傅指點，當然唔會盲摸摸喇！
陳國威（前右）同突破機構總幹事梁永泰博士（前左）攜手推動「師徒創路計劃」。
有學員（左）立志喺新地實習期間要盡心學習，而師傅會從旁指導。
新地執董兼首席財務總監陳國威喺致辭時話，該集團一向重視培育同扶植下一代，亦持續投放大量資源，畀年輕人健康成長同發展。佢話：「每個年輕人都有自己嘅潛能同長處，我相信透過種種經驗，可以幫助佢哋裝備自己，加強自信心，有助確認未來嘅路向。」
呢個計劃分為三個階段，學員阿Ben由計劃首階段開始參加，佢話起初自信心唔夠，只係抱住玩玩吓嘅心態，當進入第二階段後，先發現對歷奇活動有興趣，再從教練身上學咗唔少技巧，其後仲成功考取「中國香港挑戰網陣協會一級教練證書」添！佢感覺自己喺參與計劃後，最大嘅突破係能夠站喺人前，更自信地表達，並作帶領，佢依家期待住新地第三階段嘅職場實習。
