雖然本地學駕駛飛機嘅機會少,但亦無阻本地一班熱愛飛行人士追逐夢想,好多人都會專誠去外國學揸飛機。未有機會去外國學嘅亦唔使灰心,事關香港航空青年團(航青團)中有唔少有心人,親力親為培訓本地航空業人才。航青團一班成員日前就舉辦慈善晚宴籌募經費,「熨斗大王」Charles陳鑑光、名媛Gigi趙式芝等名人都有現身支持。

陳鑑光(右)鍾情揸飛機,太太陳鄭玉而全力支持。

趙式芝會定期駕駛私人飛機載航青團學生上天作飛行體驗。

陳李妮因為鍾意套制服而投考過空姐。

有份執教航青團嘅Gigi,目前定期都有駕駛私人飛機載航青團學生上天感受飛行體驗。佢話香港學習飛行最大限制係冇地方同銜接,就算去石崗軍營都要三千幾人輪流排期,每星期卻只開放周六同周日。好似佢咁,雖然考咗私人飛機牌照,累積咗六年飛行經驗,理應儲夠飛行時數再考其他牌照,但卻冇進一步指引去邊度考、考乜嘢牌,好迷惘,所以如將來民航學院開得成,情況就會改善好多喇!

一向鍾意揸飛機嘅Charles就話,學飛行最緊要有興趣同熱誠,所以佢冇強求愛女去學。佢仲話小朋友有時好奇怪,你愈逼佢,佢反而愈冇心機學,好似愛女去年話準備考車牌咁,唔問都好哋哋,一問愛女就即刻話遲啲先考。所以話興趣嘅嘢冇得逼,畀壓力可能仲適得其反添!

陳李妮為套制服考空姐

博愛醫院副主席陳李妮當晚亦有現身,佢選美前都做過國泰地勤,透露最初因為好鍾意套制服所以去考空姐,但完成所有面試後,卻因有幾百度近視而過不到體檢,忍唔住當場喊咗出嚟。就喺呢個時候,有個外國職員見到,問佢做乜喊,仲同佢講地勤一樣係着同一款制服,叫佢去試吓,結果梗係考到啦。佢話地勤嘅工作令佢成長不少,所以後來選美咪咁成熟得體囉。

第一手消息請下載on.cc東網iPhone/iPad/Android/Windows Phone Apps