大搜查：向貪曾請願訴求沉大海

「工廠區冇夜市，淨係做早午市，最多加埋下午茶，依家唔同以前，冇咁多工人，如果淨係做自己嗰幢（工廈）一定生存唔到！只要畀我招待本區客就咩都搞掂晒！」工廠食堂商會主席莊任明高峰時曾擁有逾十間工廠食堂，均因無法負擔容忍費，及違規被罰而結業，現時僅有兩間仍繼續經營。莊直言工廠食堂為八十代年產物，認為發牌條件早應更新，商會過去亦曾多次向政府反映，更曾向時任特首曾蔭權請願，惟訴求至今仍石沉大海。

莊又指申請成為一般食肆的條件苛刻，即使更改土地用途得到業權人同意，容忍費亦極高昂，「譬如本身十萬租，我就要額外畀多七萬，工廠食堂畀人嘅印象係價廉物美，唔可以加價太多，賺唔到仲要蝕，你叫我哋點做落去？」莊概嘆不少行家因經營環境所逼鋌而走險招待街客，加上被檢控時罰款會逐次遞增，故對繼續經營工廠食堂均心灰意冷。