政壇：乳鴿反轉區會益晒保安
相對於立法會，十八區區議會嘅保安陣容就薄弱得多，處理起類似衝突時往往雞手鴨腳。最近以中西區區議員許智峰為首嘅一批「乳鴿」，多次以激進手法衝擊區議會會議，搞到唔少區議會都紛紛增聘保安。啲納稅人嘅血汗錢，咪咁樣使咗去囉！
許智峰（右）曾以激進手法衝擊區議會會議。（資料圖片）
早前許智峰連同啲白鴿黨黨友及助理，借《基本法》宣傳撥款問題大鬧中西區區議會，最終搞到有保安受傷，要由警員出手平亂。早排許智峰仲「踩過界」，聯同環保觸覺嘅譚凱邦同幾十個當地居民去咗深水埗區議會，反對政府喺該區興建插針樓，最後又係搞到流會，嘥時間兼浪費公帑。
輪到葵青區議會早前討論插針樓問題，民政處同區議會事先收到風，話班乳鴿又會同啲環保團體到場搞事，於是臨時請多咗六名保安員幫手維持會議秩序，仲叫佢哋喺會議室內企定定「stand by」添，搞到會議氣氛相當緊張。有泛民區議員批評當局增聘保安嘅理據，質疑係咪當晒佢哋係暴民，建制派區議員就反轟泛民心裏有鬼、作賊心虛。
最後雙方就增聘保安問題拗咗個幾鐘，直至有關方面下令叫班保安員暫時撤離，改喺會議室外候命先平息到呢場爭議。查實葵青區議會內嘅泛民同建制陣營，大部分都係反對喺該區興建插針樓嘅，立場根本上就一致，都唔明有關方面點解要咁緊張，搞到要嘥公帑增聘保安員。
