政壇：法興「魔童」戲劇性投案

法興「魔童」克維爾○八年因進行違規交易勁輸四十九億歐元，差啲令銀行沒頂，一直強調自己無辜嘅佢，經過幾年訴訟纏繞，仍無法改變厄運，終於周日深夜限期前投案，將送到監獄正式服刑三年，為呢宗轟動一時嘅案件暫時畫上句號。

克維爾喺周日深夜限期前投案，將送到監獄正式服刑。（資料圖片）

克維爾今年三月喺法國最高法院維持其欺詐裁決前出走梵蒂岡，外界一度以為佢計劃潛逃，點知佢係同教宗方濟各見面，之後聲稱受到啟發，展開徒步由羅馬前往巴黎之旅，全程一千四百公里，宣揚金融業霸權嘅訊息，點知佢只走到法國同意大利嘅邊境小鎮芒通時就被捕，始終無法完成整個朝聖旅程。

一身行山裝扮嘅克維爾，喺被拘前依然向身旁採訪嘅記者批評司法制度不公義。事實上，克維爾獲不少法國人支持，百分之七十七受訪者，認為佢只係代罪羔羊，更有三百人包括其粉絲等待佢被捕一刻。