作為民意代表嘅立法會議員,一舉一動都備受公眾注目,如果有人偷懶唔做嘢,市民一定會睇得到。香港研究協會尋日發表立會議員評分調查,建仔嘅「橄欖」陳鑑林評分較上次調查大跌,擺明係受審計報告批評龍獅節被指帳目不清同亂用公帑有關。除此之外,白鴿黨「AV仁」何俊仁嘅評分亦繼續插水式下跌,相信都係受到佢喺財爺公布預算案時公然偷睇水着索女艷照所致。

設計圖片及對白

香港研究協會喺今個月頭以隨機電話抽樣方式訪問咗一千一百二十三名市民,當中立會主席曾鈺成同街工梁耀忠排名第一同第二位,但喺地區直選方面,橄欖嘅評分下跌二點三七分,排名急跌兩級,成為九龍東分數最低嘅議員之餘,亦都係所有地區直選中,跌得最勁嘅議員。

各自界別內跌幅最勁

AV仁嘅評分亦比上次調查嘅二點四二分再下跌零點零七分,分數低過晒所有超級區議員,比黨友涂謹申嘅三點零八分低零點八分咁濟,睇嚟公眾仍然未忘記佢喺立會睇艷照嘅事迹,覺得佢返工都唔係做正經嘢。

除咗橄欖同AV仁表現令人極之失望外,建仔唔少議員嘅表現亦可謂差強人意。該黨嘅葛珮帆、陳克勤、鍾樹根同陳恒鑌等人嘅分數比同區其他議員低出一截,睇嚟建仔都要好好檢討下黨員嘅表現,費事畀人覺得佢哋白逗八萬幾蚊人工唔做嘢啦!

可惜呢個研究淨係調查三十五位直選議員同五位超級區議員嘅評分,並不包括其餘三十位功能組別議員。

如果香港研究協會調查埋市民對功能組別議員嘅評分,相信畀審計報告同立法會政府帳目委員會鬧爆嘅盛事基金主席林健鋒一定會毫無懸念排包尾囉!

第一手消息請下載on.cc東網iPhone/iPad/Android/Windows Phone Apps