設計圖片及對白
社民連同人民力量各行各路後，雙方其實暗啞抵有唔少競爭，尤其係政治地盤。近日，兩陣營不約而同有靚女及戀情嘅消息，彼此各在網上晒甜蜜、鬥溫馨，其實不外乎宣傳啫，唔通兩黨呢期鬥社運女神及曝光率？
曾以「大專2012」名義參選「五區公投」嘅周澄，現時為一泛民立法會議員擔任研究助理，近排周澄經常喺男友兼社民連副主席吳文遠嘅社交網站出現，有關網頁亦上載佢同吳文遠出街食飯撐枱腳、煲愛心湯畀對方飲嘅相。
我哋問過吳文遠，佢就話唔少好友都知道兩人拍拖，近來將戀情公開化並無其他考慮，不過佢哋暫時以事業為重，未得閒思考人生大事，或者等周澄攻讀埋碩士之後，就會考慮迎娶對方喇！
不過，佢哋嘅消息，緊接人民力量主席袁彌明宣布年尾會同「謎網」行政總裁林雨陽拉埋天窗推出，有人質疑，周澄高調大晒戀情，同袁彌明宣布婚訊嘅時間不謀而合，唔知係咪因為聽到對方嘅婚訊，心思思想向另一半施壓呢？點都好，社運界兩朵花熱銷戀情，點都較硬繃繃嘅政治活動吸引支持者。
第一手消息請下載on.cc東網
