劉燕卿出任申訴專員兩個月已經上晒手。
申訴專員劉燕卿（Connie）上任近兩個月，尋日喺個活動見到佢，Connie笑笑口話新工一啲都唔辛苦，佢認為申訴專員唔會成為市民同政府部門之間嘅磨心，仲好樂意做大家嘅「和事老」添！
Connie話，上任後發現唔少個案只係雙方溝通出現誤會，未必係涉及人為疏忽，所以盡可能希望以調解方式處理。結果申訴人更快得知調查結果，攞番個公道，雙方都開心。
出席同一場合嘅懲教署署長單日堅一見到Connie就雞啄唔斷，原來佢邀請Connie多啲派員到懲教署轄下處所，以便一旦需要處理有關懲教署嘅申訴時熟手啲。但Connie就話，佢早已以太平紳士身份巡視監獄幾次，懲教署亦唔係被投訴重災區，單Sir大可放心啦！
第一手消息請下載on.cc東網
