政壇：施俊輝同葉曾翠卿有緣
高層公務員迎來退休潮，教育局原副秘書長葉曾翠卿（Betty）啱啱亦開始退休前休假，該局政治助理施俊輝（Jeff）喺社交網站上載同Betty餞行嘅合照，揭露佢哋原來好有緣。
當年
施俊輝由當年領獎嘅學生哥，變成葉曾翠卿嘅同事，十分有緣分。（互聯網圖片）
今日（互聯網圖片）
原來兩人早喺十年前已經見過，Jeff喺社交網站貼出當年兩人嘅合照，原來○四年Jeff獲選油尖旺區傑出學生，時任教育局首席助理秘書長嘅Betty頒獎畀佢，所以兩人當年咪有張合照囉，咁多年後，Jeff個樣成熟咗，兩人嘅關係亦成為同事，真係幾有趣。Jeff話，佢之前都唔知件事，直至去年為籌備婚宴搵番舊照時，先驚覺當年頒獎畀佢嘅官員好似每日坐喺佢隔籬房嘅Betty，於是連忙搵Betty相認。
