立法會審議財政預算案撥款第二年拉布，議員雖然開會數十小時，但響鐘時間佔咗四分之一，即開會四個鐘，就響鐘一小時，期間議員乜都唔使做，淨係聽鐘聲就夠喇。拉布到呢個程度，真係官怒民怨，不過議會都有一批議員受害者，佢哋本嚟排住隊提咗動議喺五月前傾，有啲仲係業界嘅任務，依家個個都被拉倒啦。

設計圖片及對白

立法會會期就嚟完

政府雖然乾塘在即，呢輪啲官員排住隊嗌救命、呻財政危機，但立法會剪布機制遲遲未出籠，真係冇晒符。不過，立法會嘅議程其實亦打亂晒，根據大會嘅議程，原本有十個議員喺本月十四日至二十八日嘅大會中提咗動議，好似教育界嘅葉建源提出改善教育施政和增撥教育經費、工聯會嘅黃國健提出成立未來基金，再有會計界嘅梁繼昌提出要求政府重整架構、改善施政等，唔少動議其實都係業界嘅聲音，但家吓拉布戰唔知幾時完，拖拖吓，立法會會期就嚟完。

被拖埋一份嘅仲有支聯會每年按慣例提出嘅六四事件，今年係六四事件廿五周年，但立法會塞車，睇怕六四動議九成九都唔可以趕及喺六四前進行，分分鐘好似去年咁，改喺立法會大樓外嘅添馬公園進行非正式辯論。

不過，支聯會今個月底都會喺城大舉行一個六四國際研討會，據聞仲有唔少猛人參加，國際研討會分兩日舉行，首日主題包括「中國民主何去何從」、「六四事件與香港發展公民社會」，第二日就有「中國公民社會發展」、「工人運動與公民社會」等。除咗本地學者同政黨代表外，仲請到「零八憲章」發起人之一嘅維權律師滕彪、美國漢學家林培瑞、研究中國近代政治嘅巴黎政治學院學者Jean-Philippe Beja等。之前多次闖關都入唔到境嘅八九民運領袖王丹同楊建利，亦會透過視像發言。至於今年會唔會再有民運人士，嘗試闖關嚟香港參加六四晚會，消息人士就話梗係有喇，但係就唔會事先張揚囉！

第一手消息請下載on.cc東網iPhone/iPad/Android/Windows Phone Apps