洋人越俎代庖 香港誰家天下

話說深水埗日前出現一班不速之客，佢哋統統係洋人，來頭唔小o架，帶頭嘅係曾多次畀中方點名批評，成日喺香港搞風搞雨嘅美國駐港總領事夏千福，佢聯同英國、日本、加拿大、澳洲、新西蘭、印度、德國駐港領事，組成「八國聯軍」浩浩蕩蕩殺入區內，簡直大陣仗。

正所謂，來者不善，善者不來，香港進入多事之秋，政改爭拗白熱化，佔領中環一觸即發，夏千福呢個時候帶領八國聯軍殺到深水埗，究竟想搞邊科？只見一行人先去一間食肆幫手派發免費食物畀基層人士，跟住又去一間燒臘飯店，探訪免費派飯畀窮人而出咗名嘅老闆，影完大合照再品嘗馳名燒腩仔，擺出一副體察民情嘅姿態。

照計，落區做騷，主角應該係港府高官，何解要請八國聯軍代勞？唔通港產官僚落區畀人鬧得多，搞到腳仔軟，畀洋人乘虛而入搶晒風頭？

係人都知，隨着特首普選嘅日子愈來愈近，外部勢力對香港事務嘅介入愈來愈深，香港管治權嘅爭奪戰愈演愈烈。喺咁嘅環境下，八國聯軍深入基層聚居嘅深水埗區，究竟所為何事，畫公仔唔使畫出腸咯。

講開又講，夏千福最叻就係做騷，來港未夠一年已經成為風頭躉。佢除咗頻頻會見反對派人士，對香港事務說三道四，而且鍾意周圍覓食，港式奶茶、魚蛋、齋菜乜都啱，仲周不時將歎美食嘅相放上網添，慌死冇人知道佢高調咁。呢次佢聯同其他領事落區做親民騷，成個八國聯軍治港咁嘅款，日後類似嘅動作睇怕陸續有來。

大家仲記得，梁振英上台初期，聲稱落區聽取民意，「一張櫈、一本簿、一支筆，你肯講，我肯聽」，可惜次次遭到反對派圍追堵截，搞到一鑊泡，結果只有三分鐘熱度，落咗幾次區之後就冇晒下文。

既然港府高官舉手投降唔敢再落區咯喎，夏千福求之不得，梗係乘虛而入喇。最耐人尋味嘅係，從英國駐港領事館上載嘅相片可以見到，當日個個領事都攞住把刀，好似示威咁，試問北大人驚唔驚？

計太一叮話齋，今年適逢甲午之年，中國面臨內憂外患，香港同樣有牛鬼蛇神伺機作亂，再加上八國聯軍裏應外合，香港想唔變天都幾難，叮！