城中鏡：顏福偉 鄧浩光變身超人蜘蛛俠
白花油王子「福仔」顏福偉同藝人鄧浩光老友鬼鬼，尋日鄧浩光就以代言人身份為和興白花油藥廠有限公司推出嘅「Everyday Hero，Everyone Hero」籌款活動拍攝宣傳照，為聯合國難民署籌款。鄧浩光以蜘蛛俠造型亮相，老闆福仔就以超人打扮呼應主題。
顏福偉（右）同鄧浩光齊拍宣傳照，為聯合國難民署籌款。
鄧浩光透露將會穿上五套英雄服飾拍照，見佢身形fit爆，佢話用咗五個月減咗三十磅。提到近年有唔少男星操fit自己，佢認為呢啲係值得鼓舞嘅事。問佢有乜嘢健身心得？佢話要「心、狠、守、辣」，「心」係恒心同貪靚嘅心，「狠」係shopping時要買細一兩個碼嘅服裝，「守」係守住心中嘅魔鬼，「辣」就係態度企硬，對家人朋友使出辣招，拒絕家人邀請佢食嘢，而佢又鍾意食辣椒，可以加快新陳代謝同流汗。佢自言已年屆五十三歲，滿意依家嘅身形，但唔敢認自己係美魔男，自封係熟魔男。
