設計圖片及對白
早前都講過，政治飯唔係咁易食，而政治人物係好講求反應快，唔可以歎慢板，如果稍為一不留神反應慢半拍，就已經被對手截胡。好似最近立法會工務小組審議一堆一爐撥款時被泛民主派議員玩「拉布」，分分鐘搞到瑪麗醫院重建工程拖慢，議員范國威一早已經去信要求政府將瑪麗醫院項目「打尖」優先審議，但公文袋嘅立法會議員陳家洛去到尋日下午五點先慢幾拍去信政府要求做同樣嘅嘢，呢啲咪執輸行頭囉！
老實講，公文袋慢幾拍已經唔係第一次，早幾日鴨脷洲海怡西商場爆發outlet風波，幾大政黨都急急派人飛去台北同大業主磋商，而屬於公文袋喺立法會港島區嘅議員陳家洛冇去，派咗葉穗倫去，但都係最慢嗰個，變咗執四攤。
不過，瑪麗醫院重建單嘢，原來該黨都未算最遲，話說陳家洛下晝五點幾發出新聞稿後，七點幾鐘就到近期另一「紅人」西貢區區議員「哪咤」方國珊，又係去信政府要求同一樣嘅嘢。不過，哪咤唔係立法會議員，所以陳家洛都係最慢嗰個。
第一手消息請下載on.cc東網
