為咗「拉布」期間方便出入會議廳，陳婉嫻特登買咗條連身裙。
依家立法會繼續就財政預算案撥款「拉布」，為咗解悶，班議員可謂各師各法，而陳婉嫻竟然為對抗「拉布」唔着褲！話說嫻姐尋日着咗條淺綠色、膊頭有通花圖案嘅連身裙，十分醒神，點知佢就話係特登為「拉布」而着嘅，因為着裙行路會快啲，就連去洗手間都快啲、方便啲喎！
嫻姐話因為「拉布」要喺會議廳坐足成日，所以要着得通爽啲。不過，原來佢呢條連身裙要過千元，仲係幫襯批發及零售界議員方剛嘅服裝品牌。佢仲話呢個品牌幫襯好耐，因為啲質地好，着得好舒服咁話。為咗對抗「拉布」嘅沉悶，佢仲收到妹妹送贈嘅公仔耳筒防塵塞，等佢開會睇住啲可愛嘅公仔會冇咁悶。
佢仲自爆好鍾意買動物形嘅公仔，試過屋企張梳化擺成十隻八隻公仔，幾乎冇位坐咁滯。佢話細個時媽媽擔心有人會利用公仔做違法事，所以唔准佢買，但佢就覺得人生應該多啲色彩，所以都係難捨呢鋪「公仔癮」。
第一手消息請下載on.cc東網
