一堆一爐遇拉布 屢戰屢敗嘆奈何
屢戰屢敗，屢敗屢戰，講得好聽係有毅力，講得難聽係無能。垃圾圍城迫在眉睫，港府無計可施，一味硬銷「三堆一爐」方案，可惜處處受阻，寸步難行，呢啲咪就係無能嘅下場囉。
嗱，繼上星期會議因為抗議者太多而被迫腰斬後，立法會工務小組尋日繼續商討擴建將軍澳堆填區及興建石鼓洲焚化爐嘅「一堆一爐」撥款申請，結果又係七國咁亂，議事堂上炮聲隆隆，議員拉布，觀眾喧嘩，甚至有區議員率領示威者下跪抗議添，令人嘆為觀止。
最搞笑嘅係，由於示威者反應太激烈，會議被迫一度中斷，之後轉場地繼續開會，又因為有人衝擊會場，加上拉布議員提出嘅修訂動議太多，最終要留待下回分解。照咁睇嚟，下回一樣唔樂觀嘅咋，就算過咗工務小組，都未必過到財委會呢關喇。
三堆一爐阻力重重，問題究竟出喺邊呢？其實，多數市民都明白垃圾唔會自動消失，就算注重環保嘅西方國家，一樣有堆填區同焚化爐，人哋做得到，香港做唔到，除咗因為部分市民唔想厭惡性設施建喺自己後花園，港府進退失據，自相矛盾，亦係主要原因。環境局局長黃錦星當初揚言只要源頭減廢做得好，就唔使急於推三堆一爐，點知源頭減廢得個講字，三堆一爐變成非推不可。官僚反口覆舌，叫市民信邊句吖？
仲有吖，舊年擴建三個堆填區計劃向立法會闖關，明明講好屯門、打鼓嶺、將軍澳三區一齊上，後來由於將軍澳居民反應激烈，當局腳軟，臨時撤回該區方案，搞到另外兩區群情洶湧，齊齊轉軚反對，最後三大皆空。前車可鑑，當局冇吸取教訓，家陣又嚟玩分拆，三堆一爐變一堆一爐，簡直令人莫名其妙。
最騎呢嘅係，當局對堆填區幾時飽和嘅講法居然一時一樣，先話將軍澳堆填區一三年飽和，跟住改口話一四年飽和，依家又話一五年先至飽和，前言不對後語，十足「狼來了」嘅翻版，唔怪得有區議員話政府信唔過喇！
不過咁，政府信唔信得過都好，擺喺眼前嘅事實係，呢個問題再唔解決，垃圾圍城絕非杞人憂天o架。係人都知，香港地少人多，垃圾更多，就算點樣做好源頭回收，循環再用，最後都難免要堆填同焚化，如果人人都唔想自己後花園有厭惡性設施，咁又點樣處理垃圾呢？所以話，一味反對係解決唔到問題嘅，大家真係要認真諗諗喇。當然，最大責任始終喺政府身上，再唔盡快諗辦法拆掂佢，政府總部遲早成為堆填區吖，叮！
