城中鏡：馮孝忠打乒乓練分析力
乒乓球老少咸宜，有團體發起推廣乒乓球運動，恒生執行董事馮孝忠（Andrew）尋日都嚟露兩手，打得好生猛。場中亦見到霍震霆同霍啟剛兩父子。
馮孝忠親自落場，同學員切磋球技。
Andrew話自己喺大學時代都有打乒乓球，除咗可以鍛煉身體，亦可以訓練分析能力同處事策略，例如估計對手將會如何反擊等，所以無論係對人或者對事，對佢都好有幫助。唔怪得之佢睇中咗年僅九歲、舊年加入「恒生乒乓球學院」嘅學員范偉樂啦。
讀小學四年級嘅范同學志向遠大，目標係加入香港代表隊，退役後轉職做教練。佢家住長洲，放學後到元朗訓練乒乓球，每次來回就要用四個鐘；一星期練五日，每次打兩個鐘，返到屋企已經係夜晚八、九點，但無損佢對乒乓球嘅熱誠，原因好簡單：「好玩。」Andrew話如果范偉樂日後退役唔做教練，可以考慮加入恒生做金融市場交易員，因為同打乒乓球一樣，兩者都好講求即時反應。
