城中鏡：何鳳蓮畫作探視人性
本港有好多默默耕耘嘅藝術工作者，新進畫家何鳳蓮由本月起至六月三十號舉行名為「大自然的力量 你看到什麼？」嘅畫展，兩年前首度舉行畫展後，佢嘅畫作就受到好評，今次再度展出四十幅精心力作，佢顯得好開心，今次畫展嘅主題，係佢探視人性嘅發現，希望觀展人步入其中共同體驗一下。
在自己嘅畫作前，何鳳蓮露出自信嘅微笑。
開幕酒會當日，何鳳蓮嘅父母同唔少朋友都有到場支持，展出嘅四十幅畫作中，採用傳統水墨製作成現代水墨畫，佢嘅畫作除咗有關大自然外，亦有關於人體，譬如以墨畫出嘅骨骼同腦袋，反映人們喺最深處嘅自我。出身於美國加州嘅何鳳蓮屬於八十後，師從美籍華裔當代藝術家劉虹等，作品總係採用人們所熟悉嘅美學元素，往往帶畀人驚喜，依家佢嘅作品已經被倫敦、巴黎、華盛頓、三藩市、新加坡甚至香港嘅收藏家收藏，而何鳳蓮就選擇喺本港生活同創作。
