城中鏡：老中青齊撐小母牛
國際小母牛香港分會早前舉行慈善晚宴，籌款委員會主席兼「快勞夾大王」杜振源（Simon）再次喺旗下酒家筵開十一席，邀請一班城中老友包括香港賽馬會大董葉澍堃（Stephen）夫婦、莎莎國際主席郭少明夫婦同佳能香港副總裁鄧慶治（Mingo）去支持，今年仲多咗年輕人加入，可以話係老中青齊晒腳。
葉澍堃（右起）、杜振源同鄧慶治相繼升呢做爺爺，大談湊孫經。
羅穎怡（左）加入做小母牛委員，同為仁濟醫院總理嘅孫蔡吐媚（中）同湯振玲（右）齊齊撐場。
張詩培（左）同廖偉麟（右）新加入小母牛大家庭，廖嘅家姐廖偉芬都出席支持。
三位爺爺紛獲道賀
當晚現身嘅新面孔有香港青年聯會常務會董張詩培同東華三院總理廖偉麟（Jeffrey），佢哋都係新加入做小母牛委員。Jeffrey家姐廖偉芬同一班年輕人拉隊去支持，而Jeffrey亦身體力行，用二十萬元投得Simon捐出嘅1982年法國佳釀。同場仲見到上月加入仁濟醫院做總理嘅羅氏針織後人羅穎怡，佢話用咗一年時間去巴黎修讀商業管理碩士學位，今年初回港大展拳腳。慈善晚宴氣氛熱鬧，眾人踴躍競投拍賣品，話咁快籌得逾五百萬元善款。
轉個頭，聽到此起彼落嘅恭喜聲，原來繼Stephen同Simon先後升呢做爺爺之後，Mingo亦唔執輸，佢囝囝鄧振豪亦幫佢添咗名乖孫，難怪當晚不停有老友向佢哋三位道賀；加上小母牛籌款委員會副主席王庭聰愛女王麗霞已有身孕三個月，相信將來小母牛會增添一班生力軍。
