立法會工務小組委員會尋日開會，傾嘅就係惹火嘅「一堆一爐」議題，會議上有公眾人士喧嘩、擾亂會議秩序，委員會主席盧偉國主持會議嘅手法遭到唔少批評，更為逃避在場公眾人士喧嘩而「斬腳趾避沙蟲」，好似走難咁轉到其他會議室開會，立法會嘅尊嚴被斷送，有委員更埋怨指揮欠妥。

設計圖片及對白

公眾人士喧嘩時，盧偉國一度相勸，但屢勸不果，保安員又請唔走啲人，個會只好轉去其他會議室開，呢個決定創咗立法會先河。點知，問題接踵而來，當委員會暫停會議四十五分鐘後續開，議員范國威提出一百零四項修訂進行表決，偏偏呢個會議室就冇電子表決系統，搞到議員舉完左手舉右手，舉多兩舉自然火都滾。建制派議員王國興質疑有啲修訂改兩粒字又提過，係重複，要求盧偉國裁決；連泛民主派議員陳家洛都質疑部分修訂究竟同擴建堆填區有咩關係？

但盧偉國就一味話會聽議員意見，激到王國興大鬧：「你對拉布就寬鬆！」主席理應保持所主持嘅會議有秩序、有效咁進行，何況一班議員已經被預算案拉布拉到火滾，轉過頭又陷入堆填區拉布，真係火到就嚟爆！

第一手消息請下載on.cc東網iPhone/iPad/Android/Windows Phone Apps