政壇：陸法蘭無懼中文股東會
上市公司開股東會，好多時都要兼顧外籍股東、非華裔公司高層，有時要雙語，有時就要安排繙譯，但和電香港尋日開股東會，就全程廣東話，皆因主席見滿堂小股東都係華人面孔，就話：「今日全部係香港人，可以開翡翠台，唔使講英文。」坐喺台上嘅和電香港非執董陸法蘭（Frank Sixt）係外籍人士喎，點算呢？但佢全程表現淡定，一啲問題都冇。
小股東本來以為股東會可能會好快轉台，點知全程都用廣東話，我哋問吓知情人士，Frank嘅同事話，佢喺香港住咗二十幾年，已經係半個香江地膽，斷估都應該識聽一啲生活上嘅廣東話用語，只係Frank好少講廣東話。唔講唔知，Frank係音樂狂熱分子，聽講佢以前喺楓葉國曾組隊夾Band，係樂隊嘅靈魂人物，皆因佢有作曲天分，仲曾經替某部電影作過曲添。
