政壇：肥亨話「馬拉松」係流嘢
政圈早排傳出「馬拉松」嘅消息，事緣商務及經濟發展局前局長馬時亨（肥亨）同前財政司司長梁錦松（阿松）相識四十四載，二人老友鬼鬼，盛傳肥亨有意推舉阿松參選下屆特首，所以被戲稱「馬拉松」。但肥亨尋日接受電視台訪問時，卻坦言推舉阿松參選特首純粹吹水，仲引述阿松話冇計劃選特首，所謂嘅「馬拉松」係流嘢喎！
肥亨話阿松冇計劃選特首，所謂嘅「馬拉松」係流嘢。（資料圖片）
肥亨笑笑口話，阿松最近向佢投訴，堅稱自己無意參選特首，唔好令人有誤會喎。肥亨話，佢個人好想擔任阿松嘅競選經理，但照阿松目前咁講法，相信應徵都係聽「失業」居多嘞。阿松唔選啫，點解肥亨唔自己親身上陣呀？肥亨再次話自己有病，六年前都係因病離開政府，斷言「可以假定我係完全唔會行番入呢個圈子」。
雖然肥亨唔參選，但佢都有幾句贈畀下一屆特首，認為對方要「有心有力」，首要毫無私心咁服務市民，同時兼備能力、親和力同凝聚力。
