政壇：高鐵佗衰 張炳民望急插
高鐵風波愈揭愈醜，搞到立法會連續兩個禮拜討論動用特權法徹查。最新民調顯示，喺港鐵疑隱瞞高鐵工程延誤風波中，涉「疑中留情」嘅運輸及房屋局局長張炳良（張炳）支持度「插水式」急跌三成二，創前年七月上任以嚟新低點，坐咗呢次過山車後，佢嘅民望同商務及經濟發展局局長蘇錦樑、教育局局長吳克儉同發展局局長陳茂波（Paul）比肩，並列支持度負分兼榜尾位置。
設計圖片及對白
局長僅高永文合格
俗語話，群眾眼睛係雪亮嘅，邊個官員辦事不力、交唔到貨，根本無所遁形。港大今個月初以電話訪問約一千名市民，發現市民近來睇淡大市，十二個局長有九人支持度下跌，僅政制及內地事務局局長譚志源同長期列榜尾嘅阿Paul「逆市上升」，食物及衞生局局長高永文就企硬榜首位置，支持度達百分之七十四，成為唯一民望合格嘅官員，其餘一律「滿江紅」。
民調進行期間，高鐵風波正愈捲愈烈，一邊港鐵爆出列車連環停駛，又被踢爆涉虛報高鐵香港段工程延誤嘅醜聞，張炳作為政府運輸部門話事人，有監察高鐵工程嘅責任，偏偏佢回應事件時，一時話唔知情，一時又被揭涉「疑中留情」，結果，港鐵內部文件相繼曝光，引發軒然大波，佢都被人質疑講大話，就係咁，張炳嘅民望咪一跌就三成二囉，真係毫不留情呀！
有行政會議非官守成員尋日就趁召開行會「聲討」張炳，警告佢事件未解決，始終要搵人就事件孭鑊。今個月夥拍張炳「插水」嘅仲有環境局局長黃錦星，跌百分之九，相信係因為主理「三堆一爐」建議而「受靶」。
