港鐵有鋪隱瞞癮 港府縱容埋禍根
食煙飲酒會上癮，係人都知，原來「隱瞞」呢家嘢都會上癮，大家又知唔知？
太一叮講緊嘅咪係醜聞一籮籮嘅港鐵囉。呢，前日一場黑雨，廣深線鐵路部分路段被淹，十幾班中港直通車要取消，點知港鐵拖到五個鐘頭之後至施施然透過傳媒公布，搞到唔少旅客白等成個下晝。旅客話就話可以三十日內退票啫，但白白浪費時間、行程被打亂，條數點計先？上到車嘅乘客都唔好得去邊，列車十足十昂坪「衫碌鈴」咁行吓停吓，原本兩粒鐘車程足足坐咗十粒鐘，苦不堪言。
真係諗極唔明，列車受天氣影響有所延誤，係不可抗拒因素，點解港鐵秘而不宣？尤其係港鐵服務質素江河日下，三日唔埋兩日出事，乘客一早見怪不怪咯，依家只係要求你盡快公布，有個預算啫，咁都要收收埋埋，瞞得就瞞？所以話港鐵有鋪隱瞞癮，真係唔係老屈o架。
連列車服務延誤都臭屎密冚，管治點會有透明度呢？嗱，又爆新醜聞嘞，高鐵工程嚴重延誤，港鐵行政總裁韋達誠被指係罪魁禍首，民意要求即刻炒佢魷魚，點知當局聲稱，舊年八月已同佢簽咗協議，出年約滿後唔再續約喎。本來呢，韋達誠未被問責，仲可以全身而退，分分鐘袋走約滿酬金，市民已經夠氣頂o架啦，如今有人更質疑港鐵冇第一時間披露韋達誠離職安排，涉嫌違反《證券及期貨條例》。呢，尋日就有政黨遊行到證監會，促請徹查事件嘞。
即係咁，如果港鐵為咗畀韋達誠下台階，編造所謂唔續約嘅協議，固然係擘大眼講大話，如果一早安排佢夠鐘就走人而唔出聲，同樣係隱瞞股東同公眾，橫又係瞞掂又係瞞，證監會即刻做嘢喇喂。
唔提高鐵猶自可，一提把幾火。高鐵工程嚴重延誤，港鐵先係話黑雨浸壞鑽挖機，點知一嘢被人踢爆，原來鑽挖機一早出現故障，同黑雨根本無關，港鐵為掩飾過失不惜以大話冚大話，令人嘆為觀止。
點解港鐵瞞得就瞞，呃得就呃？之唔係港府縱容包庇囉。運房局局長張炳良明知工程延誤，先係同港鐵聯手欺騙公眾，話「非常驚訝失望」喎，做戲咁做，跟住解釋係對港鐵「疑中留情」，希望畀空間追番進度喎，簡直侮辱公眾嘅智慧。
都係嗰句，官僚靠得住，豬乸會上樹。睇嚟香港高鐵雖然仲未同內地接軌，但官僚瞞上欺下，弄虛作假嘅歪風，唔單止同內地無縫連接，直頭提早實現一國一制呀，叮﹗
