城中鏡：邱李茂琪自製無瑕冰粒

名媛邱李茂琪出名廚藝高超，對飲食素有要求嘅佢，就算喺屋企炮製雞尾酒，都會配上唔同形狀、味道嘅冰粒。近日因為朋友一句戲言，佢決心研究雪冰粒嘅方法，結果花咗兩星期，埋頭喺屋企自製出晶瑩剔透無瑕嘅冰粒，早前佢攞住成功製成嘅冰粒放上網，自誇係一位「研究生」，佢話：「我啲朋友見我飲唔同cocktail會用唔同嘅冰粒，見我啲冰粒有紋理，於是講笑叫我不如雪啲透明無紋理嘅冰，我話好呀，自己試過好多方法都失敗，發現原來要逐層雪先可以雪出完全通透嘅透明冰粒，但每次只可以整到八粒，依家成個雪櫃都係冰，下一步我想雪透明冰波，玩大啲。」佢又話一啲日本餐廳好早已採用透明冰粒，令飲品嘅外觀更加錦上添花。