之前都講過長居日本嘅息影女星陳美齡遲啲會喺浸大執教鞭，尋日佢以講師身份出席浸大嘅講座，話九月會回港任教，尋日就算係佢正式授課前嘅一個介紹，佢話：「我喺日本教書二十幾年，教有關異文化交流論，今年有機會返香港教，好高興，先生都支持。我會香港、日本兩邊走，辛苦但值得。」佢覺得現時香港年輕人機會多咗，讀大學嘅機會亦多咗。

浸大校長陳新滋同陳美齡喺講座中舉起勝利手勢。

此外，提到啱啱過咗嘅母親節，佢話同媽咪去咗家姐屋企食飯，並準備咗蛋糕同禮物，提到佢三個仔，佢透露大仔已工作，另外兩個則仍喺美國留學，細仔係高中生，佢哋送咗茶壺同茶杯畀佢作為母親節禮物，因為知道佢喜歡飲茶，仲傳咗電郵同佢講「I love you」添！問到仔仔有冇拍拖？

佢笑住話：「三個都拍拖，細嗰個拍完又甩，甩完又拍，唔係真嘅。」想佢哋成家立室？佢就話：「無所謂，睇緣分，我以前成日畀媽咪追問得好辛苦，我唔會催佢哋。」

第一手消息請下載on.cc東網iPhone/iPad/Android/Windows Phone Apps