政壇：搞搞政：鬍鬚曾同長毛隨時玩鋪勁

鬍鬚曾同長毛最近多次公開駁火，喺剛過去嘅周日，鬍鬚曾再次出招，指拉布至今已令醫管局喪失約一百萬元利息收入，呼籲拉布議員「回頭是岸」，但卻反而遭參與拉布嘅激進泛民議員寸爆。

據聞政府已決定向長毛等人「鬥大」，消息指出政府高層今日會接力於行政會議舉行前，高調向公眾傳達「拉布癱瘓，全線告急」嘅訊息，隨後再有多個問責局長排隊開腔，逐一向市民說明拉布戰嘅實際影響，包括瑪麗醫院重建可能被迫押後、多項關愛基金試驗項目冇得變成恒常撥款等。

鬍鬚曾喺本周四會再舉行內部緊急會議，召集各個政策局代表商討臨時撥款一旦耗盡嘅應變方案，據悉當局將優先支付畀外判工人同供應商嘅開支，相反被視為「鐵飯碗」嘅公務員人工就押至最後先支付，變相借全港公務員同紀律部隊向拉布議員施壓。

政府內部更有人提出長毛等人根本係「唔見棺材唔流眼淚」，建議鬍鬚曾「玩鋪勁」，任由得政府財政跌落懸崖，令香港好似美國咁出現政府部門關門大吉、各項公眾服務同資助津貼停頓等，藉此迫使長毛等人棄械投降，停止拉布。但講到底呢招係「七傷拳」，極可能傷人又傷己，唔知鬍鬚曾敢唔敢玩到咁大呢？