育有一女嘅菁英會榮譽主席楊華勇，喺剛過去嘅母親節當日再添丁，B仔出世時重六磅六安士，兩姊弟湊成一個「好」字，真係可喜可賀！

楊華勇、太太莊菲娜、大女國盈同剛於母親節出世嘅國盟溫馨合照。

楊華勇話B仔預產期本來係十五號，但佢同家人商量後，決定擇個吉日提早開刀，咁蹺當日係西方嘅母親節，太太收到呢份大禮，又開心又溫馨。至於B仔個名就由爺爺楊孫西負責改，最後取名「國盟」，寓意堅守盟約同承諾嘅意思，英文名就暫時未諗到。

幾時擺百日宴？佢話大女國盈出世時都冇搞百日宴，無謂「大細超」，一家人食餐飯慶祝已心滿意足。問及會唔會響應政府呼籲生三個，眨眼已「三年抱兩」嘅佢自言已完成「首階段任務」，抖一抖先再決定。

第一手消息請下載on.cc東網iPhone/iPad/Android/Windows Phone Apps