喺呢個世代，政治飯唔係咁易食，好似做民選區議員咁，唔好以為母親節落區派吓花，搞吓蛇宴就得。好似鴨脷洲海怡西商場風波，個個政黨都飛去台灣同大業主對話，除咗當區區議員新民黨陳家珮成功飲到頭啖湯同公司總裁對談外，白鴿黨區諾軒都有呢個機會。到尋日人民力量同公文袋又派人飛去台北尋求對話，可惜時間係唔等人，兩人都摸門釘，唔能夠同該公司總裁會面。呢次真係「執輸行頭慘過敗家」嘅最佳演繹。

設計圖片及對白

聲言只見區議員

由於海怡西商場大業主係台資公司「太平洋電線電纜」，就算今次只係南區一個小商場風波，但戰線已擴展到台北。自陳家珮上星期成功飛去台灣同太平洋總裁會面後，個個政黨都爭相倣效，「乳鴿」區諾軒雖然唔係當區區議員，但憑住佢堅毅精神打動公司總裁，總裁都同佢傾咗成二十分鐘，成功執二攤。

到尋日人力主席Erica袁彌明同公文袋葉穗倫諗住照辦煮碗飛去台北就已經太遲喇。

Erica喺網上話成功同負責人直接對話，並提出租戶要求，但據聞總裁根本無返工，而且亦向保安下達命令，只會見區議員，就算佢係人力主席都無用。好彩最後有一男一女聲稱係公司發言人接見佢，仲收晒佢帶去嘅千幾封簽名信，總算有個交代。雖然無得見總裁，但佢都喺間公司門口影相留念，個樣仲帶點楚楚可憐，唔通佢喺過程中受盡委屈？

最遲飛去台北嘅葉穗倫就只能夠「執四攤」，但對方仍然不厭其煩，派出一名副總經理同佢見見面，解釋海怡西商場唔會變名店特賣場。唔知道今後仲有無政黨打算飛去台北「執五攤」呢？

第一手消息請下載on.cc東網iPhone/iPad/Android/Windows Phone Apps