綠巴優惠分階段 敬老隨時變虐老

「兩蚊乘車計劃」係畀公公婆婆及合資格殘疾人士以每程兩元嘅優惠價乘搭交通工具，初衷係好嘅，問題係一直只限於港鐵、專營巴士及渡輪，並不包括專線小巴，好多偏遠地區無法受惠，批評之聲不絕於耳。好嘞，當局終於宣布優化計劃，最快明年首季將計劃擴展至綠色專線小巴，而本月十八日開始，十二歲或以下合資格殘疾兒童亦可參加計劃。擴展計劃雖然係姍姍來遲，但亦總算聊勝於無。

為咗隆重其事，勞工及福利局局長張建宗仲特別喺網誌撰文，吹到神乎其神，話優化計劃後，政府每年額外支付六億元，但佢覺得物有所值喎，事關公公婆婆出街多咗，唔止社交圈子闊咗，連病痛都少咗，仲可以促進家庭和睦，社會和諧，差啲講到促進世界和平咁滯。講真，自吹自擂有邊個唔識吖，弊就弊在當局做嘢天一半地一半，張局長又話喎，由於目前專線小巴營辦商超過一百五十個，涉及四百多條路線及三千多部車輛，所以要分階段實施，至於幾時先至全面實施，佢就提都冇提。

綠巴優惠分階段推行有乜嘢問題？到時有啲車有優惠，有啲車冇優惠，叫公公婆婆如何分辨呢？係人都知，好多公公婆婆嘅學識水平唔高，接收資訊嘅渠道亦唔多，又老眼昏花，隨時為咗慳錢而上錯車，搞到蕩失路，有家難回，咁就大鑊嘞。所以話啫，當局好心隨時做壞事，咁同玩殘老人家冇乜分別o架咋。

講開又講，香港交通費之高幾乎冠絕全球，仲要年年加價，唔好話公公婆婆慳得一蚊得一蚊，打工仔何嘗唔係嗌晒救命吖。其實以公帑津貼公共交通喺世界各地都好普遍，好似美國嘅公交資金咁吖，只有三成七來自票價，其餘都係政府補貼。北京市政府為咗減少塞車，鼓勵更多人乘坐公交，每年大手筆補貼三十幾億元。港府成日話要中港融合，同內地接軌，結果貪腐就接咗軌嘞，人哋嘅好嘢偏偏唔學，問你點頂！

學古人話齋，「治世以大德，不以小惠」，港府反其道而行不特止，連小恩小惠都搞到一塌糊塗，盞畀人笑話嘅咋。好心張局長醒吓啦，你都好快成為長者一名，為人為己，唔好餐餐敬老變虐老得唔得，叮！