城中鏡：司馬燕抗癌因禍得福
抗癌勇士司馬燕日前接受某電台訪問細訴患上胃癌前後嘅經過同感受，佢憶述患病時第一日入院，最擔心嘅唔係自己嘅病情，只係顧住醫院嘅環境靚唔靚，而喺首次入院做手術時，手術時間多過十小時，比原定時間長咗大約四小時，令手術房外嘅親友擔心不已，佢大仔吳澋滔亦擔心到不停喊。司馬燕笑說佢反而關心咁多人哄住佢，可能會有好多菌添！
司馬燕形容患病令佢因禍得福，兩公婆重拾拍拖嘅甜蜜感覺。
司馬燕對於患病抱非常積極嘅態度，佢形容今次嘅病情為因禍得福。因為病，令佢兩公婆重拾拍拖嘅甜蜜感覺。老公同佢坐郵輪、再結婚，甚至連煮食時都要拖住佢嘅手，幸福滿瀉。
昔日縱橫Ball場嘅佢依家雖然唔可以再飲酒，但依然貼近時下潮流，閒時會追韓劇同化韓妝出街。貪靚嘅佢因為手術關係，由尾龍骨到胸口嘅位置留下一條長達十幾吋嘅疤痕，所以佢會物色可以遮住疤痕嘅泳衣，不減着泳衣嘅意欲。
