城中鏡：趙式芝學識報恩 蜘蛛女服務社群
由城市女青年商會舉辦嘅「全港時尚專業女性選舉」又開鑼，前日啟動禮邀請咗多位歷屆得獎者分享心得，包括卓能集團執行董事Gigi趙式芝、長洲搶包山前冠軍「蜘蛛女」Lisa鄭麗莎同最年輕保險公司女區域總監Karine林桂芝。
兩位歷屆得獎者鄭麗莎（右）同林桂芝（左）都人靚心哋好，愛心爆棚。
趙式芝趁母親節，同媽咪去打高爾夫球同食飯慶祝。
國際青年商會香港總會會長關俊華希望多啲年輕女性貢獻社會。
適逢尋日係母親節，Gigi話會同媽咪一齊去打高爾夫球同食飯慶祝；而懷孕五個月嘅Lisa就話出席多項母親節活動後，開始感受到做媽咪嘅溫暖感覺。
要做到時尚專業女性，除咗事業上有一番作為外，參與社會服務亦相當重要。Gigi話最初參與社會服務嘅原因，唔係為咗自己，而係認為作為一個企業家，應該要照顧社會被忽略嘅一群，仲話：「學識感恩係一種領悟，識報恩先係一個人嘅成就」。同樣作為時尚女性嘅Lisa，最難忘係有次幫手派米，見到排咗半日隊嘅婆婆緊緊捉住佢隻手連聲道謝，令佢非常感動，自此成為佢服務社會嘅推動力。
山區小朋友：跟你玩就飽
Karine則試過去山區做義工，好似武俠片咁徒手喺啲泥上面爬上間學校。雖然佢只係教啲小朋友學英文同玩遊戲，但見啲小朋友天黑都唔願返屋企，連飯都唔食，仲同佢講：「跟你玩就飽」。就係呢句說話，令佢心都軟埋，明白自己對人嘅一點關懷，原來可以係別人好期待或難得嘅經驗，幫助有需要嘅人同時，可以感受生命嘅力量，學識珍惜自己擁有的一切。城市女青年商會會長黃詩韻同獎項首席評審趙麗娟就希望，可以選出默默為社會付出而又有個人風格嘅女性，成為其他青年嘅學習對象。
