政壇：搞搞政：反對侍產假 廿蚊張衰多鑊
最近立法會討論男士侍產假，飲食界議員張宇人一句「我轉咗性變咗男人，我都有侍產假喎」，隨即惹起勞工界不滿，令佢繼上次反最低工資後再次被網民攻擊，唔知今次網民又會幫佢改乜嘢花名呢？
設計圖片及對白
話說前日立法會審議緊《僱傭條例》，將男士三天侍產假加入法例，放假期間亦可以八折支薪。點知佢就喺開會期間爆出金句，質疑法例一旦容許變性人有男士侍產假，係咪所有女士變性後，只要搵個大咗肚嘅女士做太太，然後嬰兒出世紙爸爸嗰欄填自己個名，就算唔係經手人都有三日侍產假呢？
反最低工資 被轟無良僱主
佢似乎講完仲未知衰，繼續發炮批評政府慷他人之慨，話侍產假唔應該由商界找數，仲話政府庫房「鬼死咁多錢」，不如由政府向所有企業補貼侍產假嘅支出喎。就係以上呢幾番說話，隨即被指為歪理，激嬲唔少勞工界團體，網上仲有多幅改圖諷刺佢。
其實，佢亂講嘢都唔係第一次，成名之作首推當年立會審議最低工資時，佢話如果最低工資定喺廿蚊會對企業有好大影響，此言一出隨即被轟為無良僱主。直到前年又有另外一單，當時立會討論緊性傾向歧視條例係咪立法，佢無啦啦話驚僱主會因為對同性戀有唔同睇法而誤墮法網，又話擔心未婚員工會同普通朋友扮成伴侶一齊分享福利，令企業成本大大增加，令到支持同性戀團體向佢口誅筆伐。
身為飲食界代表，佢擔心侍產假增加業界嘅成本係正常憂慮，但都要合情合理先得o架！
