由反國民教育科至推出政改方案，學民思潮召集人黃之鋒成為風頭躉，但過去有關佢嘅只係政治新聞，反而戀情就鮮有傳出。不過，尋日下午五點幾鐘喺旺角兆萬中心對開，就發現之鋒攬住一名少女並行，沿途有講有笑，尤其尋日早上及下午兩度懸掛黃色暴雨警告訊號，一把細小雨傘兩份遮，所以有咁實攬咁實，狀甚親暱。

黃之鋒（前左二）攬住一名少女在雨中漫步，沿途有講有笑，狀甚親暱。

同之鋒一齊嘅少女穿着牛仔短褲，上身就同之鋒一齊着上情侶間條衫，之鋒右手臂彎一直攬住女方，並同女方一齊擔遮，左手則挽住一個時裝品牌嘅紙袋，呢間店喺旺角都有分店，相信係佢哋之前行街有所斬獲。雖然兩人攬到實一實，但在滂沱大雨下，難免要濕身。

我哋問過之鋒嗰名少女嘅身份，佢就好斬釘截鐵話唔會回應任何揣測或傳言，之後佢又「遊花園」，話近期學民思潮電郵戶口疑被黑客入侵、懷疑有人跟蹤，所以對四方八面嘅評論不作回應，講政改方案就冇問題喎！不過，我哋影到嘅係相片，唔係揣測或傳言，唔通佢驚戀情「見光死」？

第一手消息請下載on.cc東網iPhone/iPad/Android/Windows Phone Apps