政壇：高永文農墟掃20幾斤菜
隨住本土意識逐漸抬頭，市民連食菜都鍾意幫襯本地菜農。漁護署、蔬菜統營處同新界菜聯社有見及此，年初喺屯門藍地合辦「周日農墟」，專售本地出產嘅信譽蔬菜。呢個農墟尋日正式開幕，食物及衞生局局長高永文現身撐場，連掃全場二十幾檔菜檔，買咗二十幾斤菜返屋企。唔通佢一家人都改食素？佢話屋企食飯最少都有七、八個人，而且屋企人鍾意食菜，預計三、四日就可以「消耗」晒啲戰利品嘞！
高永文（右二）喺何俊賢（右三）陪同下買咗二十幾斤菜，塞滿晒成個車尾箱。
以往每逢有局長落區撐場，好多時都係簡單幫襯吓就算，但尋日高永文一到藍地農墟就話要買菜，所以開幕儀式完成後，佢急不及待走去掃貨。佢喺立法會漁農界議員「高佬賢」何俊賢陪同下，逐檔逐檔去買，仲要唔講價，無論係買西洋菜定買節瓜，一律二十元唔使找，檔主當然笑到見牙唔見眼啦，由於現場二十幾檔菜檔，佢總共使咗五百元買菜，塞滿晒成個車尾箱，好似個迷你菜田咁款。
