政壇：黑英狂插韋達誠失職
高鐵工程延誤兼超支事件引來全城關注，唔少人批評港鐵行政總裁韋達誠辦事不力，要求佢下台謝罪。雖然韋達誠及後透露自己已經表明明年約滿後唔會再續約，但仍然有人要求扣除韋達誠今年花紅，以示懲罰。天文台前台長「黑英」林超英，早前曾經就發展郊野公園一事批評政府「盲搶地」，佢尋日就再喺個人網誌發炮批評韋達誠管理無能，知道高鐵工程延誤後更加設計隱瞞政府，敷衍塞責，仲將事件責任推卸畀工程總監周大滄，質疑港鐵當初搵佢出任行政總裁並唔係因為管理過紐約地鐵，而係因為佢手持美國護照。
設計圖片及對白
遲早發生鐵路災難
除咗高鐵事件外，黑英鬧爆韋達誠管理港鐵幾年來一事無成，唔顧安全強行增加地鐵班次，搞到事故頻繁。佢話將地鐵同高鐵放喺佢手上，發生鐵路災難只係遲早嘅事，又話此人不去，香港人實在不能安心。黑英話，雖然有人話替代人選難找，但佢認為地鐵之內有好多本地資深員工，向外聘請總裁根本就係一個錯誤，又以昂坪360為例，喺外人管理下一塌糊塗，證明只有本地員工先至識得配合香港環境，安全運作港鐵同興建高鐵。
黑英直指韋達誠今次明顯有嚴重缺失，但就好蠱惑咁將責任推卸畀運輸及房屋局局長張炳良，搞到外界有要求張炳良「問責」下台嘅聲音。佢盛讚張炳良有決心收拾上屆政府留低嘅爛攤子，致力增加房屋供應，又重新啟動居屋計劃，好明顯交足功課。佢又話，雖然張炳良今次孭咗半隻黑鑊，但就覺得無需要為事件問責，又話實則要下台嘅係港鐵總裁喎。
雖然黑英咁講，但張炳良事實上係知情不報，單憑港鐵片面之詞就「疑中留情」，結果最終搞出大頭佛，莫非呢啲唔算係失職？
