反腐利劍出鞘 港澳斬妖除魔

呢，中央反腐連出重招，有「洗錢天堂」之稱嘅澳門首當其衝。本報得到嘅可靠消息指出，中國銀聯為打擊澳門洗黑錢活動，最快七月一日開始收緊賭場非法碌卡行為，到時澳門賭場範圍內將見唔到銀聯終端機。係人都知，為逃避內地外匯管制，澳門賭場容許內地豪客非法碌卡嘅情況愈來愈普遍，舊年透過銀聯卡流入賭場嘅非法資金接近五百億港元，問題愈來愈嚴重，當局想唔正視都唔得喇。雖然有澳門立法會議員質疑新措施嘅成效，認為內地賭徒一樣可以喺賭場外嘅終端機提取現金去賭，澳門當局只係做啲門面工夫敷衍吓。但無論點都好喇，銀聯終端機絕迹賭場，起碼可以傳達反腐訊息，令內地賭徒有所收斂。

除咗收緊賭場非法碌卡，當局亦正研究縮短持內地護照過境者嘅留澳時間，將現時嘅七天逗留期，縮短至三至五天。如果措施落實，對賭場影響好大o架。近日中央電視台踢爆，珠海及深圳多間旅行社代辦假簽注，供未有港澳簽注者前往澳門，呢班人十居其九去賭博，如果當局杜絕假簽注，加上收緊賭場非法碌卡及縮短旅客逗留時間，訪澳內地客進一步減少咯喎，賭場想唔拍烏蠅都幾難。

話時話，呢場反腐風暴對澳門嘅影響已陸續浮現。由於當局連環出招，投資者憂慮澳門「水源」枯竭，賭場盈利前景被睇淡，導致濠賭股持續急挫，其中呂志和家族持有嘅銀河娛樂最傷，日前更遭基金大洗倉，累計身家自高位蒸發約六百億元，都咪話唔得人驚。正所謂，風水輪流轉，賭場風光不再，日後都幾難有運行。

當然喇，反腐風暴浩浩蕩蕩，冇運行嘅唔止澳門，香港同樣受到吹襲，隨時爆大鑊o架。眾所周知，回歸後港澳兩地亂鬥亂，澳門係「金玉其外，敗絮其中」，香港就係「外表骯髒，內裏污穢」，尤其經過貪曾七年之禍，官商勾結愈演愈烈，多名高官捲入貪腐醜聞，連廉政公署都自身難保，搞到廉潔指數每況愈下。呢嗱，隨着華潤集團董事長宋林貪腐醜聞被揭發，中紀委決定徹查香港五大央企，包括華潤、中銀、中信、光大國際及招商局，好戲在後頭吖。

計太一叮話齋，反腐只有一國，沒有兩制，內地打老虎拍蒼蠅，港澳梗係唔可以例外。老實講吖，兩個特區烏煙瘴氣，藏污納垢，早就應該整頓喇，係咪！