「妖，好耐都冇搞過，嚟啦！」房內傳出淫賤黎嬌嗲之聲。「唔係啩，又講呢啲。」房外嘅少膽虫毛管戙。「好！搞就搞啦！」四把聲音齊響。有云︰「三人行必有我師。」依家嚟個「五人行」，實一地都係得益啦！

「但有成十幾種方法，揀用邊種搞好？」隱約聽得出係李漢奸把聲。一陣鴉雀無聲，淫賤黎打破沉默，「少膽虫，你同我入嚟！」一房六人，今次真係點搞？「少膽虫，你話用西好唔好？」淫賤黎問。「我邊有犀……利成咁，唔識答。」少膽虫驚到口震，卻見淫賤黎同飯民四子坐咗喺度，「少膽虫，我哋想攪局，你話用西好唔好？」

「哦，攪局，但成日靠西人實招人話柄。」少膽虫講完又硬食一巴掌，「你腦細我咁蠢咩？我話由十幾種方法，篩剩幾款出嚟再揀！」淫賤黎怒吼。

「咁咪即係篩選？腦細你一向以民主自居喎。」「潮流興篩選民主，你睇吓隔籬圈玩得幾出色，連我飯民啲friend都畀人踢出嚟。」淫賤黎自負說。睇嚟少膽虫對民主認知，真係太年輕了……

第一手消息請下載on.cc東網iPhone/iPad/Android/Windows Phone Apps