好多人都唔明白究竟咩叫「轉珠」，以為「轉珠」係一個潮語，但查實「轉珠」係一個潮Game，多於一個潮語。「轉珠」其實係手機遊戲嘅一個種類。玩法就係將畫面上面嘅一粒粒類似寶石嘅「珠」移動，轉來轉去，務求令相同顏色嘅「珠」連成一行，就可以「化」咗個行「珠」從而攞分或攞到法術，過關升「呢」。

早輪喺立法會一個小組會議中，一位嚟自基層嘅婆婆，因為一啲老人社福政策，大鬧政黨明日之星。婆婆用帶鄉音嘅粗口，痛罵富二代不理民間疾苦，更詛咒他將來會瞓街兼跌落坑渠。有人拍低咗當時情形，並上載上網。結果嗰段片被網民瘋傳。好多網民高呼大快人心，盛讚阿婆鬧得好。當事人就反駁嗰段短片斷章取義，並無提及他的發言，扭曲事實。姑勿論真相如何，呢件事或多或少反映到社會中貧富之間的對立。憎人富貴又未必真的只是基層人士，好多香港中產長期承受生活壓力，對有錢人嘅憎惡亦都可以理解。怪就怪特區政府政策長期向大集團、大地產商傾斜，以致貧富懸殊嚴重。富貴人家當然不會體驗到拾紙皮婆婆嘅生活困苦，呢個可以理解。但係，佢竟然喺開會期間玩「轉珠」，如果第時選呢啲人入立法會，咁就真係只能講句，香港人抵死！

「轉珠」類遊戲，最初源自日本手機遊戲Puzzle & Dragon，後來被香港遊戲開發商「抄考」成為另一個遊戲，仲賣到五億！令到涉嫌「抄考」嘅香港公司發咗達。到底富二代喺立法會玩嘅「轉珠」係邊款遊戲唔重要，但最重要係令香港市民睇到，立法會絕對唔再係議政嘅神聖地方。就連民主黨嘅立法會議員何俊仁都可以公然喺開會期間用iPad睇AV女優，玩「轉珠」又算得乜？

最近立法會又要因財政預算案而拉布，長毛因為拉布而公然喺開會期間瞓覺。呢個又真係值得原諒，佢為嘅係「全民退保」而拉布，好過所謂泛民，布又唔拉、會又唔開，不知所謂！

第一手消息請下載on.cc東網iPhone/iPad/Android/Windows Phone Apps