政壇：搞搞政：裸聊陷阱搵陳智思過橋
席捲全球的「裸聊陷阱」已有好多人中過招，有啲中咗招冇報警。雲端與流動運算專業人士協會會長陳家豪（Emil）透露，騙徒其中一種犯案手法，係狂Add一啲政商界名人做網上朋友，將自己裝扮成有名有姓嘅上流社會分子，佢就遇過一位自稱係行政會議成員陳智思同立法會議員田北俊嘅「朋友」嘅網上騙徒，聲稱「性飢渴」撩佢「Cyber Sex」，佢冇上當，但就有佢識嘅人中咗招！
設計圖片及對白
早喺兩年前、即「裸聊陷阱」仍未廣為市民認識時，佢已經收到一位「靚女」喺網上搭訕，仲整咗張瞇眼、張嘴嘅意態撩人「大頭相」喺網上，「靚女」又自稱畢業於名牌大學，任職於某大公司，短短幾個月內，狂Add咗大批政商界名人做朋友，企圖將自己裝扮成「名人圈」嘅一分子。佢一眼識破，但就扮「無間道」，繼續同對方交談，冇耐「靚女」就大膽直言「性飢渴」，露出真面目。
據了解，除咗假扮名人嘅朋友行騙，有網上騙徒更直接變身名人，求其喺網上搵張某位名人嘅相片做人頭相，再Add其他名人做網友，城中某位知名嘅政商界兼娛樂界名人二代，就曾經畀人冒認過。有人打畀有關名人二代求證，對方就話「我從來都唔玩facebook嘅！」眾人至知受騙。
