政壇：拉布三子周身病痛
立法會「拉布」三子上周起就財政預算案撥款發動「拉布」戰，可惜作戰四日，三子身體已經響起警號，莫講話通宵開會「開夜車」加快進度，就算星期一、二加開會議，睇怕三子都捱唔住。「慢必」陳志全尋日出席人民力量成立三周年晚宴時坦言，是但一個瞓低，其餘兩個都撐唔住喇，咁咪分分鐘自我剪布呢？
長毛「拉布」拉到便秘，睇怕繼續「拉布」都頂唔到好耐。
人民力量成立三周年，尋日舉行晚宴慶祝。
慢必坦言，「拉布」四日加上其他委員會會議排晒落星期一、二開會，把聲幾乎冇休息過，加上連日同反對「拉布」嘅王國興動真火，搞到聲沙沙冇乜氣，擔心隨時病倒。唔單止慢必有事，「長毛」梁國雄亦無端端腸道唔暢順引發便秘，而陳偉業（大舊）亦因為長期唔夠瞓，搞到熱氣牙肉腫痛，對「拉布」發言唔多吉利喎。
另一邊廂，曾參選南區區議會海怡西選區補選嘅袁彌明（Erica），今日會繼陳家珮、區諾軒後，「執三攤」赴台抗議海怡西商場改建outlet（特賣場），公民黨陳家洛亦派代表赴台「趁墟」，難為身在台灣嘅業主要連日應酬呢班友。
