政壇：李樂詩分享探險珍藏

極地探險家李樂詩四出奔走二十幾年，「心血結晶」氣候變化博物館去年底成功落戶中文大學，展出佢十八次遠征南、北極嘅珍貴資料。博物館成立一周年，佢諗住作啲改變，新增一啲最近搵番出嚟嘅探險資料同市民分享。

李樂詩

李樂詩尋日以香港童軍總會青少年活動委員會副主席身份出席童軍活動，罕有咁穿上整套童軍制服示人添。佢笑言，多年來嘅探險珍藏四散喺佢屋企，同埋香港專業教育學院（IVE）柴灣分校辦公室，佢要經常「兩頭騰」整理，今次大執屋，希望將所有珍藏一併送交博物館後，咁樣屋企都可以騰空多啲位置，亦會企理四正一啲喎。