政壇：王庭聰雙喜臨門

香港工商總會會長王庭聰大女王麗霞（Crystal）去年底註冊結婚，話咁快造人成功，已經有咗三個月，佢嘅丈夫邢高福（Jimmy）話，已經決定到時要剖腹生產，事關自然生產閒閒哋要捱十幾小時陣痛，佢唔忍心太太受苦，所以寧願擇吉日開刀生產。

王麗霞（中）話咁快就有咗三個月身孕，佢爸爸王庭聰（左）及丈夫邢高福（右）勁開心。

王庭聰難掩即將升呢做外公嘅喜悅心情，仲加料自爆細女亦即將出嫁，真係雙喜臨門。佢擔任國際小母牛香港分會籌款委員會副主席多年，一直慷慨解囊，嫁女時收到嘅百萬禮金都捐出去，好心有好報，有辦你睇。