政壇：富二代開會「三不」曾德成變大頭佛

據了解，啲富二代開始滲入各種委員會後，開始時冇表現都預咗，但有啲富二代就根本冇攞個心出嚟做嘢，有人更一直奉行「三不政策」，即不看文件、不做功課、不發言；加上有啲委員會仲欠缺相關範疇嘅專業人士，搞到次次開會都淪為吹水會，更甚係連吹水都嫌費事。

話說有關委員會當中有幾名成員都係富二代，幾乎每次開會都係奉行「三不政策」，如果事前唔睇文件同備課，開會又可以講到啲咩吖，莫非打天才波？其中一位富二代嘅父親都係政界人士，呢位富二代一係唔出聲，一出聲就語出驚人，曾就穩定樓市雙辣招政策同父親立場對着幹，有人聽到都陰陰嘴笑。

用半個鐘吹噓自己生意

另一位開會時鮮有發言嘅商界富二代，講得最多嘢嘅就係第一次開會，用咗半個鐘嚟自我介紹，但就唔係介紹自己做過啲咩公職、有咩專業背景，而係不斷吹噓自己啲生意，真係聽到大家瞌晒眼瞓。

其實，家吓政府有乜諮詢架構要換人，部門都會向民政事務局攞資料，呢啲有幸被推薦嘅精英，表現大都獲得業界認可，近年隨住富二代喺政壇及商界愈趨活躍，佢哋又自成組織，行善、公益不甘後人，所以咪漸漸打入諮詢架構囉，依家富二代惹嚟批評之聲，睇嚟政府都要攞放大鏡嚟認真篩人至得。