棒下未必出孝子 暴力管教要三思

呢，本港虐兒問題原來比想像中嚴重得多，你話兒童會唔會快樂吖？即係咁，有團體調查發現，受訪嘅八至十三歲兒童中，六成二表示曾受到父母暴力管教，較三年前同類調查高出十八個百分點，當中逾三成受到身體虐待，約一成半更受到嚴重身體虐待添，數字唔止令人意外，簡直令人震驚。

有社工話，虐兒行為主要涉及子女學習問題，部分家長未必察覺得到，以為子女唔聽教，冇心機讀書，鬧句「咁蠢o架」，甚至打吓手掌摑兩巴好平常，其實呢種行為已經構成虐兒。

唔係講笑o架，本港虐兒問題的確不斷惡化。社會福利署舊年接獲近千宗虐兒個案呈報，比前年多咗近百分之八，愈來愈多兒童淪為家庭暴力犧牲品，真係令人難以置信。古代就話「棒下出孝子」啫，家陣已經係廿一世紀，點可以隨便動粗o架。不可不知，父母採取暴力手段管教子女，隨時惹上官非o架。

呢嗱，早排有位兒童偷媽咪錢買零食，父親竟然用鞋帶綁住佢雙手，以衣架責打一小時；幾日後又因為兒子欠交功課，再以拖鞋打臉同手臂，老師發現後報警，呢位父親因兩項虐兒罪被判接受感化令一年。

講到底，暴力管教解決唔到問題，而且往往適得其反添。你知喇，依家小朋友普遍早熟，又容易受朋輩嘅影響，萬一因為受虐而變得更加反叛，豈不是弄巧反拙？正如心理專家話齋，父母虐打子女，除咗令兒童自信心同安全感受損，積聚更多負面情緒，亦會嚴重破壞雙方關係，為人父母千祈唔好衝動吖。

話時話，可憐天下父母心，有邊個父母唔愛護自己子女o架。虐兒問題惡化，相信有好多原因，父母工作及生活壓力大，可能就係主要原因之一。香港搵食艱難，大人樣樣都煩，喺心煩氣躁之下，有時控制唔到情緒都唔出奇嘅。前排有婦女團體調查發現，接近四成受訪婦女受到「精神欠佳」、「情緒不穩」問題困擾，主因係家庭同工作壓力。你話嘞，咁嘅精神狀態下畀子女激一激，家長有乜法子唔火爆吖。

歸根究柢，虐兒問題唔止係家庭問題，亦係社會問題。家陣香港經濟呆滯，民生凋敝，矛盾激化，成個社會吵吵鬧鬧，家庭點可能和諧吖，香港又點可能有運行吖，叮！